A review by siren224
رجال ريا وسكينة by صلاح عيسى

5.0


هو ليه رجال ريا وسكينة؟ يعني الاتنين مشتركين سوا الرجالة والستات بس ليه رجال؟!
الموضوع مش فيمنيست وكل ده بس استغربت العنوان

تعبت لي أعصابي
مقدرتش أتعاطف معاهم في الاول
بس حسيت بأسى فظيع عليهم في المحكمة ولما اتعدموا
معرفش تعليق صلاح عيسى الله يرحمه على المسلسل اللي اتعمل استنادًا للي حكاه في كتابه
بس أنا حسيت بالغيظ أنه حتى الكتاب اللي حاول يشوف الجرايم من وجهة نظرهم لما عملوه مسلسل ضيع كل التعاطف معاهم
فترة بائسة في تاريخ مصر
وتاريخ العالم كله
يمكن لما قريت الكتاب حمدت وشكرت ربنا إني مش مكانهم
أول الكتاب كنت حاسة باشمئزاز رهيب منهم وكره شديد ل ريا يمكن لأن في انطباعات سابقة من المسلسلات مثلا
أو لأن فعلا هم يستحقوا ده
بس في التحقيقات وفي المحاكمة كرهت وكيل النيابة اللي اشمئز زيي بالظبط ! يمكن لأنه مكنش ينفع يحس كدة وهو مفروض قائم بالعدل
مكنش ينفع يكون منحاز
وكرهت قرفه من الضحايا مع إنهم قبل ما يكونوا ضحايا ريا وسكينة كانوا ضحايا مجتمع فاسد يمكن وكيل النيابة من أسباب فساده…
الكتاب منظم وبالرغم من طوله وانه تقريبا ٩٠٠ صفحة
محستش بزهق إلا لما حكى عن الافلام والمسلسلات
غريب الموضوع اني لأول مرة أفكر في إنه ازاي يعملوا فعلا مسرحية ولا فيلم كوميدي على جريمة بشعة زي دي
واللي لفت نظري لده صاحبتي السورية بتول وطلع فعلا عندها حق
يمكن دي مش مراجعة وتميل أكتر إنها تسجيل انطباعاتي عن اللي حصلهم
الغريب برده ان في ناس معتقدة انهم مش حقيقيين وان كل ده فبركة
والغريب أكتر اني قربت اعتقد ان عرابي وعبد الرازق فعلا مظلومين!

الوصف الاجتماعي والتاريخي للأحداث مفصل من غير ملل
بالعكس يمكن انا قريت كتير عن الحرب العالمية الاولى والتانية في أوروبا
بس مكنتش أتخيل أبدًا تأثيرها على مصر والمصريين
يمكن كمان قريت وجهة نظر المصريين بس طبقة متوسطة وعليا في الروايات المصرية
لكن اللي كان بيحصل فعلا أول مرة اكتشف انه بالفظاعة دي
سؤال بيتكرر في دماغي هل الظروف دي كانت مبرر حقيقي للي عملوه
مرة قريت ان اللي بيقتل بيكون عنده شهوة للقتل بتخمد لما فعلا يقتل وتتجدد وهكذا
طيب ريا وسكينة مقتلوش ومفروض انهم أرق قلب
خصوصا ريا اللي اكتشفت انها نفسيًا أضعف من سكينة
بالرغم من أن ريا تبان أقوى!
احيانا بفكر برده هل القصاص ده كافي انهم ميتحاسبوش عليها في الآخرة!
الموضوع مرعب جدا جدا
حلمت بكواييس بسبب صورهم
بالرغم اني بشوف عبد العال وسكينة فعلا مش وحشين شكلا
لكن الفكرة نفسها في القتل وبعدين انه يعيشوا عادي وتحتهم الجثث مرعبة!
فكرت انه ما الناس من قديم الأزل عايشة في المقابر
بس دول قتلوهم بأيديهم وكانوا ناس يعرفوهم والأهم كانوا ناس غلابة
فشل الكتاب نوعًا ما في إنه يقدم مبرر لوحشيتهم
خصوصا ان الظروف دي كانت على ملايين المصريين
برزت حادثتين بس
يعني مش حاجة عامة
وفي نفس الوقت كلام ريا انه لو فتحت بيت مرخص مكنش حصل ده كله
معناه انهم كانوا فعلا يقدروا يكملوا حياتهم
من غير القتل!
محدش يقدر يفهم النفس الانسانية
بس مبقتش عارفة هل مفروض افقد اندهاشي بوحشية الانسان بالرغم من انها حاجة منذ نزول آدم عليه السلام إلى الأرض…
الكتاب ده من أفضل قراءاتي السنة دي بلا منازع..